ಅಭಿಮಾನಿಗಳ ಹೆಸರಿನಲ್ಲಿ ಕಿಡಿಗೇಡಿಗಳ ಹುಚ್ಚಾಟ: ವಿಜಯಲಕ್ಷ್ಮಿ ದರ್ಶನ್ ವಿರುದ್ಧ ಅವಾಚ್ಯ ಟ್ರೋಲ್!

ಅಭಿಮಾನ ಎನ್ನುವುದು ಒಂದು ಕಲಾವಿದನಿಗೆ ದೊರೆಯುವ ಅತಿ ದೊಡ್ಡ ಬಲ. ಆದರೆ, ಅತಿಯಾದಾಗ ಅದು ಅಂಧಾಭಿಮಾನ ಆಗಿ ಮಾರ್ಪಡುತ್ತದೆ. ಇತ್ತೀಚಿನ ದಿನಗಳಲ್ಲಿ ಸೋಶಿಯಲ್ ಮೀಡಿಯಾದಲ್ಲಿ ಕೆಲವರು ಅಭಿಮಾನಿಗಳ ಹೆಸರಿನಲ್ಲಿ ವಿಷ ಕಕ್ಕುವ ಪ್ರವೃತ್ತಿ ಹೆಚ್ಚಾಗಿದೆ. ವೈಯಕ್ತಿಕ ಜೀವನದ ಬಗ್ಗೆ ತಿಳಿಯದೇ ಕಾಮೆಂಟ್‌ ಮಾಡುವುದು, ಮಹಿಳೆಯರ ಬಗ್ಗೆ ಅವಹೇಳನಕಾರಿ ಮಾತುಗಳು, ಅಸಭ್ಯ ಮೀಮ್ಸ್‌ ಇವೆಲ್ಲವೂ ಸಾಮಾನ್ಯವಾಗಿದೆ.

ನಿರ್ಮಾಪಕಿ ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಅವರ ಬಗ್ಗೆ ಮಾಡಲಾದ ಅವಹೇಳನಕಾರಿ ಪೋಸ್ಟ್‌ ಭಾರೀ ಚರ್ಚೆ ಹುಟ್ಟುಹಾಕಿತ್ತು. ಸಿಎಂ ಸಿದ್ಧರಾಮಯ್ಯವರಿಗೂ ಈ ವಿಚಾರ ತಲುಪಿದ್ದು, ಅಭಿಮಾನಿಗಳು ಪೊಲೀಸರಿಗೆ ದೂರು ನೀಡುವ ಮಟ್ಟಕ್ಕೆ ಹೋಗಿದ್ದರು. ಅದೇ ರೀತಿ ದರ್ಶನ್ ತಾಯಿ ಮೀನಾ ತೂಗುದೀಪ ಹಾಗೂ ಪತ್ನಿ ವಿಜಯಲಕ್ಷ್ಮಿ ಕುರಿತಾದ ಕೆಟ್ಟ ಕಾಮೆಂಟ್‌ಗಳು ಜನರ ಗಮನ ಸೆಳೆದಿದ್ದವು. ಇತ್ತೀಚಿಗೆ ನಟಿ ರಮ್ಯಾ ಅವರಿಗೆ ಕಿಡಿಗೇಡಿಗಳು ಅಸಭ್ಯ ಮೆಸೇಜ್‌ ಕಳುಹಿಸಿದ್ದು, ಅದನ್ನು ತಾವು ಸಾರ್ವಜನಿಕವಾಗಿ ಹಂಚಿಕೊಂಡು ದೂರು ದಾಖಲಿಸಿದ್ದರು. "ಇದು ದರ್ಶನ್ ಅಭಿಮಾನಿಗಳ ಕೆಲಸ" ಎಂದು ರಮ್ಯಾ ಆರೋಪಿಸಿದ್ದರಿಂದ ಮತ್ತಷ್ಟು ಚರ್ಚೆಗೆ ಕಾರಣವಾಯಿತು. ಪೊಲೀಸರು ಕೆಲವರನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಿದ್ದರು.

ರೇಣುಕಾಸ್ವಾಮಿ ಪ್ರಕರಣದಲ್ಲಿ ನಟ ದರ್ಶನ್ ಮತ್ತೆ ಜೈಲಿಗೆ ಹೋದ ಹಿನ್ನೆಲೆಯಲ್ಲಿ, ಅವರ ಪತ್ನಿ ವಿಜಯಲಕ್ಷ್ಮಿ ಸೋಶಿಯಲ್ ಮೀಡಿಯಾದಲ್ಲಿ ಕಿಡಿಗೇಡಿಗಳ ಗುರಿಯಾಗಿದ್ದಾರೆ. ಅಶ್ಲೀಲ ಪದಗಳಿಂದ ಮಾಡಿದ ಟ್ರೋಲ್‌ಗಳು ಅಷ್ಟರ ಮಟ್ಟಿಗೆ ಕೆಳಮಟ್ಟದಲ್ಲಿವೆ ಎಂದು ಹೇಳಲು ಸಹ ಸಾಧ್ಯವಿಲ್ಲ. ಈ ಘಟನೆ ಅಭಿಮಾನಿಗಳ ಕೋಪಕ್ಕೆ ಕಾರಣವಾಗಿದೆ. ಸೈಬರ್ ಕ್ರೈಮ್ ಪೊಲೀಸರು ಹಾಗೂ ಬೆಂಗಳೂರು ನಗರ ಪೊಲೀಸ್ ಟ್ವಿಟರ್‌ಗೆ ಟ್ಯಾಗ್ ಮಾಡಿ ಕ್ರಮಕೈಗೊಳ್ಳಬೇಕೆಂದು ಮನವಿ ಮಾಡಲಾಗುತ್ತಿದೆ. ಮಹಿಳಾ ಇಲಾಖೆಯೂ ಇದರ ಮೇಲೆ ಗಮನ ಹರಿಸಬೇಕು ಎಂದು ಆಗ್ರಹ ವ್ಯಕ್ತವಾಗಿದೆ.

ಸಾಮಾನ್ಯವಾಗಿ ಇಂತಹ ಅಸಭ್ಯ ಕಾಮೆಂಟ್‌ಗಳು ಫೇಕ್ ಅಕೌಂಟ್‌ಗಳು ಮೂಲಕ ಬರುತ್ತವೆ. ಒಂದು ಮೂಲೆಯಲ್ಲಿ ಕೂತು ನಿಜವಾದ ಧೈರ್ಯವಿಲ್ಲದೆ ವಿಷ ಉಗುಳುವ ಈ ಮನೋವೈಕಲ್ಯ, ನಿಜವಾದ ಅಭಿಮಾನಿಗಳಿಗೂ ಕೆಟ್ಟ ಹೆಸರು ತರುತ್ತದೆ. ದರ್ಶನ್ ಅಂಧಾಭಿಮಾನಿಗಳ ಹೆಸರಿನಲ್ಲಿ ನಡೆಯುತ್ತಿರುವ ಈ ದಾಳಿಗಳ ಬಗ್ಗೆ, ನಟ ತಾವೇ ಸ್ಪಷ್ಟವಾಗಿ ಅಭಿಮಾನಿಗಳಿಗೆ ಸಂದೇಶ ನೀಡದೇ ಇರುವುದೇ ಪ್ರಶ್ನೆಯಾಗಿದೆ. ನಟಿ ರಮ್ಯಾ ಸಹ ಇದೇ ವಿಚಾರವನ್ನು ಪ್ರಸ್ತಾಪಿಸಿದ್ದರು.

ಅಭಿಮಾನ ಎನ್ನುವುದು ಪ್ರೀತಿಯ ಸಂಕೇತ, ಆದರೆ ಕಿಡಿಗೇಡಿಗಳ ಹುಚ್ಚಾಟವೇ ಹೆಚ್ಚು ಗಮನ ಸೆಳೆಯುತ್ತಿರುವುದು ವಿಷಾದನೀಯ. ನಟ-ನಟಿಯರ ವೈಯಕ್ತಿಕ ಬದುಕಿನ ಬಗ್ಗೆ ಅವಹೇಳನಕಾರಿ ಮಾತುಗಳು ಕೇವಲ ಕಾನೂನು ಸಮಸ್ಯೆಗಷ್ಟೇ ಕಾರಣವಾಗುವುದಿಲ್ಲ, ಅದು ನಿಜವಾದ ಅಭಿಮಾನಿಗಳ ಹೆಸರಿಗೂ ಕಲೆ ತರುತ್ತದೆ. ಅಭಿಮಾನದಲ್ಲಿ ಮಿತಿ ಇರಬೇಕು. ಅಭಿಮಾನವು ಕಲಾವಿದನಿಗೆ ಬಲವನ್ನೇ ನೀಡಲಿ, ಆದರೆ ಸಮಾಜಕ್ಕೆ ವಿಷವಲ್ಲ.