'ಬಿಲ್ಲ ರಂಗ ಬಾಷಾ' ಚಿತ್ರ: ಮೊದಲ ಹಂತದ ಶೂಟಿಂಗ್ ಮುಕ್ತಾಯ, ಯುರೋಪ್‌ನಲ್ಲಿ ವಿಎಫ್‌ಎಕ್ಸ್!

ಸ್ಯಾಂಡಲ್‌ವುಡ್ ಕಿಚ್ಚ ಸುದೀಪ್ ಅಭಿನಯದ ಬಹು ನಿರೀಕ್ಷಿತ ಸಿನಿಮಾ 'ಬಿಲ್ಲ ರಂಗ ಬಾಷಾ' ಈಗ ಹೊಸ ಹಂತಕ್ಕೆ ಕಾಲಿಟ್ಟಿದೆ. ಡೈರೆಕ್ಟರ್ ಅನೂಪ್ ಭಂಡಾರಿ ನಿರ್ದೇಶನದ ಈ ವಿಜನ್ ಸಿನಿಮಾ ತನ್ನ ಮೊದಲ ಹಂತದ ಶೂಟಿಂಗ್ ಅನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ. ಟೈಟ್ ಸೆಕ್ಯೂರಿಟಿ ನಡುವೆ ಶೂಟಿಂಗ್ ನಡೆದಿರುವ ಕಾರಣ, ಶೂಟಿಂಗ್ ವಿವರಣೆ ಇನ್ನೂ ಬಹಿರಂಗವಾಗಿಲ್ಲ.

ಚಿತ್ರದಲ್ಲಿ ಭರ್ಜರಿ ಬಜೆಟ್‌ ಮತ್ತು ಹೈಟೆಕ್ ಎಲಿಮೆಂಟ್ಸ್‌ ಬಳಕೆಯಾಗುತ್ತಿದೆ. ವಿಶೇಷವಾಗಿ ವಿಎಫ್‌ಎಕ್ಸ್ ಕೆಲಸವನ್ನು ಯುರೋಪ್‌ನಲ್ಲಿ ನಡೆಸಲಾಗುತ್ತಿದೆ ಎಂಬುದು ದೊಡ್ಡ ಸುದ್ದಿ. ಇದು ಚಿತ್ರದ ಗುಣಮಟ್ಟ ಹೆಚ್ಚಿಸಲು ಸಹಾಯ ಮಾಡಲಿದೆ.

ಇನ್ನು ಕಿರು ವಿರಾಮದ ಬಳಿಕ, ಆಗಸ್ಟ್‌ನಲ್ಲಿ ಎರಡನೇ ಹಂತದ ಶೂಟಿಂಗ್ ಆರಂಭವಾಗಲಿದೆ. ಇತ್ತ ಡೈರೆಕ್ಟರ್ ಅನೂಪ್ ಭಂಡಾರಿ ಅವರು ತಮ್ಮ ಹಿಟ್ ಸಿನಿಮಾ 'ರಂಗಿತರಂಗ' ಬಿಡುಗಡೆಯ 10ನೇ ವಾರ್ಷಿಕೋತ್ಸವದ ಪ್ರಯುಕ್ತ ಜುಲೈ 4 ರಂದು ಅದನ್ನು ಪುನರ್‌ ಬಿಡುಗಡೆ ಮಾಡುತ್ತಿದ್ದಾರೆ.

ಈ ಸಿನಿಮಾದಲ್ಲಿ ಡೈಲಾಗ್ ಕಿಂಗ್ ಸಾಯಿಕುಮಾರ್ ಪ್ರಮುಖ ಪಾತ್ರ ವಹಿಸಿದ್ದಾರೆ ಎಂಬ ಸುದ್ದಿ ಫ್ಯಾನ್ಸ್‌ಮಧ್ಯೆ ಭಾರೀ ಕುತೂಹಲ ಮೂಡಿಸಿದೆ. ಆದರೆ ಅಧಿಕೃತ ಘೋಷಣೆ ಇನ್ನೂ ಬಾಕಿ ಇದೆ. ಇದೆಲ್ಲದರೊಂದಿಗೆ, 'ಬಿಲ್ಲ ರಂಗ ಬಾಷಾ' ಸ್ಯಾಂಡಲ್‌ವುಡ್‌ನ ದೊಡ್ಡ ಚಿತ್ರವೊಂದಾಗಿ ರೂಪುಗೊಳ್ಳುತ್ತಿದೆ.