"ಮೂಟೆ ಕಟ್ಟಿ, ಸಿಲಿಂಡರ್ ಹಾಕಿ ಸಾಯಿಸುತ್ತೇವೆ!"; ರಜತ್ ಕಿಶನ್ ಪತ್ನಿಗೆ ಬೆದರಿಕೆ ಸಂದೇಶ

ಕನ್ನಡದ ಜನಪ್ರಿಯ ನಟ ರಜತ್ ಕಿಶನ್ ಇತ್ತೀಚೆಗೆ ಧರ್ಮಸ್ಥಳಕ್ಕೆ ಭೇಟಿ ನೀಡಿದ ನಂತರ ಅನಿರೀಕ್ಷಿತವಾಗಿ ವಿವಾದದ ಕೇಂದ್ರಬಿಂದು ಆಗಿದ್ದಾರೆ. ಈ ಭೇಟಿ ಬಳಿಕ, ಕೆಲವರಿಂದ ರಜತ್ ಹಾಗೂ ಅವರ ಪತ್ನಿ ಅಕ್ಷಿತಾ ಅವರಿಗೆ ಗಂಭೀರ ಬೆದರಿಕೆ ಸಂದೇಶಗಳು ಬಂದಿದ್ದು, ಈ ಕುರಿತು ಅಕ್ಷಿತಾ ಪೊಲೀಸರಿಗೆ ಅಧಿಕೃತ ದೂರು ನೀಡಿದ್ದಾರೆ.

"ಬಹಳ ದಿನಗಳಿಂದ ಸ್ನೇಹಿತರ ಜೊತೆ ಸೇರಿ ಧರ್ಮಸ್ಥಳಕ್ಕೆ ಹೋಗಬೇಕು ಎಂಬ ಆಲೋಚನೆ ರಜತ್ ಅವರಿಗಿತ್ತು. ಬಿಗ್ ಬಾಸ್ ಶೋಗೆ ಹೋಗುವ ಮೊದಲು ಈ ಬಗ್ಗೆ ಅವರು ಮಾತನಾಡಿದ್ದರು. ಸಮಯದ ಅಭಾವದಿಂದ ಹೋಗಲು ಸಾಧ್ಯವಾಗಿರಲಿಲ್ಲ. ಈಗ ಸಮಯ ಮಾಡಿಕೊಂಡು ಹೋದಾಗ, ಕಾಕತಾಳೀಯವಾಗಿ ಅಲ್ಲಿ ಗಲಾಟೆ ನಡೆಯಿತು" ಎಂದು ಅವರು ಹೇಳಿದರು. ಧರ್ಮಸ್ಥಳ ಭೇಟಿಯ ಕೆಲ ಗಂಟೆಗಳಲ್ಲೇ, ಅಕ್ಷಿತಾ ಅವರಿಗೆ ಅನೇಕ ಬೆದರಿಕೆ ಸಂದೇಶಗಳು, ಸ್ಟೇಟಸ್‌ಗಳು ಹಾಗೂ ಫೋನ್‌ ಕಾಲ್‌ಗಳು ಬರತೊಡಗಿದವು.

ಶಾರದಾ ಭಟ್ ಎಂಬ ವ್ಯಕ್ತಿಯಿಂದ ಸ್ಕ್ರೀನ್‌ಶಾಟ್‌ಗಳು ಬಂದವು. “ನಿನ್ನ ಗಂಡನನ್ನು ಕರೆದುಕೊಂಡು ಹೋಗು, ಇಲ್ಲದಿದ್ದರೆ ಕೇಸರಿ ಬಣ್ಣ ಮಾಡಿಬಿಡುತ್ತೇವೆ” ಎಂಬ ಧಮ್ಕಿ. “ಮೂಟೆ ಕಟ್ಟಿ, ಸಿಲಿಂಡರ್ ಹಾಕಿ ಸಾಯಿಸುತ್ತೇವೆ” ಎಂಬ ಬೆದರಿಕೆ. ಅಕ್ಷಿತಾ ಈ ಸಂದೇಶಗಳ ಫೋಟೋಕಾಪಿ ಮಾಡಿ ಸಾಕ್ಷ್ಯವಾಗಿ ಸಂಗ್ರಹಿಸಿದ್ದಾರೆ. “ಸೋಶಿಯಲ್ ಮೀಡಿಯಾದಲ್ಲಿ ಇಷ್ಟು ಧೈರ್ಯವಾಗಿ ಬೆದರಿಕೆ ಹಾಕುತ್ತಾರೆ ಎಂದರೆ, ಅವರಿಗೆ ಹಿಂದೆ ಎಷ್ಟು ಬೆಂಬಲವಿದೆ ಎಂಬುದು ಸ್ಪಷ್ಟವಾಗುತ್ತದೆ. ಮಂಡ್ಯ ಜಿಲ್ಲೆಯ ವಿಷಯವನ್ನು ಅನವಶ್ಯಕವಾಗಿ ಈ ವಿವಾದಕ್ಕೆ ಎಳೆದು ತರುವುದು ಅಕ್ಷೇಪಾರ್ಹ. ಈ ಹೇಳಿಕೆಗಳು ಕೇವಲ ಧಮ್ಕಿಗಳಲ್ಲ ಅವು ಜೀವಭದ್ರತೆಗೆ ಧಕ್ಕೆಯಾಗುವಂತಹವು.”

ರಜತ್ ಕಿಶನ್ ಆರಂಭದಲ್ಲಿ ಈ ವಿಚಾರವನ್ನು ನಿರ್ಲಕ್ಷಿಸಲು ಸಲಹೆ ನೀಡಿದರೂ, ಬೆದರಿಕೆಗಳು ವೈಯಕ್ತಿಕ, ಕುಟುಂಬ ಹಾಗೂ ಪ್ರಾದೇಶಿಕ ಅಸ್ಮಿತೆಗೆ ಧಕ್ಕೆ ತರುವಂತಾಗಿದ್ದರಿಂದ ಅಕ್ಷಿತಾ ಮುಂಜಾಗ್ರತಾ ಕ್ರಮವಾಗಿ ಪೊಲೀಸರಿಗೆ ದೂರು ನೀಡಿದ್ದಾರೆ. “ಅಕಸ್ಮಾತ್ ಹೆಚ್ಚು-ಕಡಿಮೆ ಆದರೆ ಏನು ಗತಿ? ಆದ್ದರಿಂದಲೇ ನಾನು ಪೊಲೀಸರಿಗೆ ದೂರು ನೀಡಲು ಬಂದಿದ್ದೇನೆ” ಎಂದು ಅವರು ಸ್ಪಷ್ಟಪಡಿಸಿದರು. ಈ ಘಟನೆ, ಸಾಮಾಜಿಕ ಮಾಧ್ಯಮದಲ್ಲಿ ನಡೆಯುತ್ತಿರುವ ದುರುಪಯೋಗ, ದ್ವೇಷ ಭಾಷಣ ಮತ್ತು ಬೆದರಿಕೆ ಸಂಸ್ಕೃತಿ ಕುರಿತಂತೆ ಮತ್ತೆ ಚರ್ಚೆ ಹುಟ್ಟುಹಾಕಿದೆ. ಅಕ್ಷಿತಾ ಪ್ರಕರಣದಲ್ಲಿ ಕಾನೂನು ಎಂತಹ ತೀರ್ಪು ನೀಡುತ್ತದೆ ಎಂಬುದನ್ನು ಈಗ ಎಲ್ಲರೂ ಕಾದು ನೋಡುತ್ತಿದ್ದಾರೆ.