“ಪುರುಷ ಸ್ನೇಹಿತರ ಜೊತೆ ಪೋಸ್ಟ್ ಮಾಡಿದ್ರೆ ಡೇಟಿಂಗ್ ಅಂತಾ?” – ರಮ್ಯಾರ ತೀವ್ರ ಅಸಮಾಧಾನ!

ಸ್ಯಾಂಡಲ್‌ವುಡ್‌ ಕ್ವೀನ್‌ ರಮ್ಯಾ ಯಾವಾಗಲೂ ಸುದ್ದಿಯಲ್ಲೇ ಇರುತ್ತಾರೆ. ಕೆಲವೊಮ್ಮೆ ತಮ್ಮ ಸಿನಿಮಾಗಳಿಗಾಗಿ, ಕೆಲವೊಮ್ಮೆ ತಮ್ಮ ರಾಜಕೀಯ ಹೇಳಿಕೆಗಳಿಗಾಗಿ, ಮತ್ತೊಮ್ಮೆ ತಮ್ಮ ಸೋಶಿಯಲ್ ಮೀಡಿಯಾ ಪೋಸ್ಟ್‌ಗಳಿಗಾಗಿ. ಇತ್ತೀಚೆಗೆ ಅವರು ನಟ ವಿನಯ್‌ ರಾಜ್‌ಕುಮಾರ್‌ ಜತೆ ಹಂಚಿಕೊಂಡ ಕೆಲವು ಫೋಟೋಗಳು ದೊಡ್ಡ ಮಟ್ಟದಲ್ಲಿ ವೈರಲ್‌ ಆಗಿದ್ದು, ಹಲವು ಗಾಸಿಪ್‌ಗಳಿಗೆ ಕಾರಣವಾಗಿವೆ.

ಸದ್ಯ ಅಮೆರಿಕ ಪ್ರವಾಸದಲ್ಲಿರುವ ರಮ್ಯಾ, ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ವಿನಯ್‌ ರಾಜ್‌ಕುಮಾರ್‌ ಹಾಗೂ ಪುನೀತ್‌ ರಾಜ್‌ಕುಮಾರ್‌ ಪುತ್ರಿ ವಂದಿತಾ ಜೊತೆಗಿನ ಫೋಟೋಗಳನ್ನು ಹಂಚಿಕೊಂಡಿದ್ದರು. ಆ ಫೋಟೋಗಳಲ್ಲಿ ವಿಶೇಷವಾಗಿ ವಿನಯ್‌ ಜತೆಗಿನ ಚಿತ್ರಗಳು ಹೆಚ್ಚು ಕಂಡು ಬಂದ ಕಾರಣ, ನೆಟ್ಟಿಗರು ತಕ್ಷಣವೇ ತಮ್ಮದೇ ಕಥೆಗಳನ್ನು ಕಟ್ಟಿಕೊಂಡರು. “ರಮ್ಯಾ ದೊಡ್ಮನೆ ಸೊಸೆಯಾಗ್ತಾರಾ?”, “ಇವರಿಬ್ಬರು ಡೇಟಿಂಗ್ ಮಾಡ್ತಿದ್ದಾರೆ”, “ಮದುವೆ ಖಚಿತ” ಎನ್ನುವ ರೀತಿಯ ಕಾಮೆಂಟ್‌ಗಳ ಮಹಾಪೂರವೇ ಹರಿಯಿತು.

ರಮ್ಯಾರ ಸ್ಪಷ್ಟನೆ, ಇದಕ್ಕೆ ಕೊನೆಗೂ ಪ್ರತಿಕ್ರಿಯಿಸಿದ ರಮ್ಯಾ, ನೆಟ್ಟಿಗರ ಕಲ್ಪನೆಗೆ ಕಟ್ಟುನಿಟ್ಟಾಗಿ ಬ್ರೇಕ್‌ ಹಾಕಿದರು. “ವಿನಯ್‌ ನನ್ನ ತಮ್ಮನಿದ್ದಂತೆ. ನಿಮ್ಮ ಕಲ್ಪನೆಗೂ ಮಿತಿ ಇರಲಿ” ಎಂದು ಸ್ಪಷ್ಟಪಡಿಸಿದರು. ಅಷ್ಟೇ ಅಲ್ಲ, ಮತ್ತೊಂದು ಪೋಸ್ಟ್‌ನಲ್ಲಿ ಅವರು ಇನ್ನಷ್ಟು ಕಿಡಿಕಾರಿದ್ದಾರೆ: “ನಾನು ಪುರುಷ ಸ್ನೇಹಿತರ ಜೊತೆ ಫೋಟೋ ಹಾಕಿದಾಗಲೆಲ್ಲಾ, ಅವರನ್ನು ಮದುವೆಯಾಗುತ್ತಿದ್ದೇನೆ ಅಥವಾ ಡೇಟಿಂಗ್ ಮಾಡುತ್ತಿದ್ದೇನೆ ಎಂಬ ಗಾಸಿಪ್ ಮಾಡುವುದು ಸಂಕುಚಿತ ಮನಸ್ಸಿನ ಆಲೋಚನೆ. ನಾನು ಡೇಟಿಂಗ್ ಮಾಡುತ್ತಿದ್ದರೆ ಅಥವಾ ಮದುವೆಯಾಗುತ್ತಿದ್ದರೆ, ಅದನ್ನು ನೇರವಾಗಿ ನನ್ನಿಂದಲೇ ಕೇಳುತ್ತೀರಾ. ನನ್ನ ಇನ್‌ಸ್ಟಾಗ್ರಾಂನಲ್ಲಿ ಏನು ಹಾಕಬೇಕು ಎಂಬುದನ್ನು ನಿರ್ಧರಿಸುವ ಹಕ್ಕು ನನಗೆ ಇದೆ.”

ವಾಸ್ತವವಾಗಿ ರಮ್ಯಾ, ದಿವಂಗತ ಪವರ್‌ಸ್ಟಾರ್‌ ಪುನೀತ್‌ ರಾಜ್‌ಕುಮಾರ್‌ ಆಪ್ತರ ಪೈಕಿ ಒಬ್ಬರು. ಪುನೀತ್‌ ಜೊತೆ ಅನೇಕ ಸಿನಿಮಾಗಳಲ್ಲಿ ನಟಿಸಿರುವ ಅವರು, ಅಪ್ಪು ಸೆಟ್‌ಗಳಿಗೆ ವಿನಯ್‌ ರಾಜ್‌ಕುಮಾರ್‌ ಸಹ ಆಗಾಗ ಬರುವುದರಿಂದ ಇವರಿಬ್ಬರ ನಡುವೆ ಸ್ನೇಹ ಬೆಳೆದು ಬಂದಿದೆ. ಈ ಸ್ನೇಹ ಇಂದಿಗೂ ಮುಂದುವರಿದಿದ್ದು, ವಿನಯ್‌ ಕೂಡ ರಮ್ಯಾರನ್ನು ಅಕ್ಕನಂತೆ ಕಾಳಜಿ ವಹಿಸುತ್ತಾರೆ.

ಸೋಶಿಯಲ್ ಮೀಡಿಯಾದ ಕಾಲದಲ್ಲಿ ಸೆಲೆಬ್ರಿಟಿಗಳು ಪೋಸ್ಟ್ ಮಾಡುವ ಪ್ರತಿಯೊಂದು ಫೋಟೋ, ಪ್ರತಿಯೊಂದು ಸ್ಟೋರಿ ಅಭಿಮಾನಿಗಳ ಕಲ್ಪನೆಗೆ ಆಹಾರವಾಗುತ್ತಿದೆ. ಆದರೆ ರಮ್ಯಾರ ತಾಜಾ ಪ್ರತಿಕ್ರಿಯೆ ಒಂದು ಪಾಠ ಹೇಳುತ್ತದೆ ಸೆಲೆಬ್ರಿಟಿಗಳು ಕೂಡ ತಮ್ಮ ಖಾಸಗಿ ಬದುಕನ್ನು ತಮ್ಮ ಇಷ್ಟಕ್ಕೆ ನಡೆಸಿಕೊಳ್ಳುವ ಹಕ್ಕು ಹೊಂದಿದ್ದಾರೆ.

ರಮ್ಯಾರ ಸ್ಪಷ್ಟನೆ ಈಗ ನೆಟ್ಟಿಗರ ಊಹಾಪೋಹಗಳಿಗೆ ತೆರೆ ಎಳೆದಿದ್ದು, ವಿನಯ್‌ ರಾಜ್‌ಕುಮಾರ್‌ ಜೊತೆಗಿನ ಅವರ ಸ್ನೇಹದ ನಿಜ ಸ್ವರೂಪವನ್ನು ಎಲ್ಲರಿಗೂ ತೋರಿಸಿದೆ.