ಆಗ ಟೆಂಪಲ್ ರನ್, ಈಗ ಜೈಲ್ ರನ್ – ದರ್ಶನ್‌ಗಾಗಿ ಜೈಲು ಸುತ್ತುತ್ತಿರುವ ವಿಜಯಲಕ್ಷ್ಮಿ!

ಸ್ಯಾಂಡಲ್‌ವುಡ್‌ನಲ್ಲಿ ದರ್ಶನ್ ಹೆಸರು ಕೇಳಿದರೆ ಅಭಿಮಾನಿಗಳು ಹರ್ಷದಿಂದ ಹೆಮ್ಮೆಪಡುತ್ತಾರೆ. ಆದರೆ ಇತ್ತೀಚೆಗೆ ಅವರ ವೈಯಕ್ತಿಕ ಜೀವನವೇ ಹೆಚ್ಚು ಸುದ್ದಿಯಾಗಿದೆ. ನಟ ದರ್ಶನ್ ಮತ್ತೊಮ್ಮೆ ಜೈಲಿನ ಬಾಗಿಲು ತಟ್ಟಿದ್ದಾರೆ, ಮತ್ತು ಈ ಬಾರಿಯೂ ಅವರ ಪತ್ನಿ ವಿಜಯಲಕ್ಷ್ಮಿ ದರ್ಶನ್ ಅವರ ಜೊತೆಯಲ್ಲಿದ್ದಾರೆ ಆದರೆ ಈಗ ಟೆಂಪಲ್ ರನ್ ಬಿಟ್ಟು ‘ಜೈಲ್ ರನ್’ ನಡೆಸುತ್ತಿದ್ದಾರೆ.

ಪತಿಯ ಪರದೈವ ಎಂದು ಸದಾ ಹೇಳಿಕೊಂಡಿರುವ ವಿಜಯಲಕ್ಷ್ಮಿ, ದರ್ಶನ್ ಬಂಧನಕ್ಕೊಳಗಾದ ಕ್ಷಣದಿಂದಲೇ ಚಿಂತೆಯಲ್ಲಿ ಮುಳುಗಿದ್ದಾರೆ. ದರ್ಶನ್ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ಇದ್ದಾರೆ, ಅವರನ್ನು ಭೇಟಿಯಾಗಲು ವಿಜಯಲಕ್ಷ್ಮಿ ಅಲ್ಲಿಗೆ ತೆರಳುತ್ತಿದ್ದಾರೆ. ಇದರಿಂದಲೇ “ಇನ್ನೆಷ್ಟು ದಿನ ಈ ಜೈಲು ಸುತ್ತಾಟ?” ಎಂಬ ಪ್ರಶ್ನೆ ಎದ್ದಿದೆ.

ಒಂದು ಕಾಲದಲ್ಲಿ ದರ್ಶನ್ ಜೈಲಿನಲ್ಲಿದ್ದಾಗ, ಪತಿಯನ್ನು ಬಿಡುಗಡೆ ಮಾಡಿಸಿಕೊಳ್ಳಲು ವಿಜಯಲಕ್ಷ್ಮಿ ದೇವರ ದರ್ಶನ ಮಾಡಿ ಹರಕೆ ಕಟ್ಟಿಕೊಂಡಿದ್ದರು. ಬಳ್ಳಾರಿಯಿಂದ ಹಿಡಿದು ಪರಪ್ಪನ ಅಗ್ರಹಾರವರೆಗೆ, ವಾರಕ್ಕೊಮ್ಮೆ ಪತಿಯ ಹಿತಕ್ಕಾಗಿ ಜೈಲು ಬಾಗಿಲು ತಟ್ಟುತ್ತಿದ್ದರು. ಜಾಮೀನು ಮೇಲೆ ಹೊರಬಂದ ನಂತರ ದರ್ಶನ್ ಜೊತೆ ಮೈಸೂರಿನ ಚಾಮುಂಡಿ ಬೆಟ್ಟ, ಮಂಡ್ಯದ ಉಕ್ಕಡ ಮಾರಮ್ಮ, ಕೇರಳದ ಮಡಾಯಿಕಾವು, ಕೊಟ್ಟಿಯೂರು ಶಿವನ ದರ್ಶನ, ಗುವಾಹಟಿಯ ಕಾಮಾಕ್ಯೆ ದೇವಸ್ಥಾನಗಳಲ್ಲಿ ಹರಕೆ ಸಲ್ಲಿಸಿದ್ದರು. ಟೆಂಪಲ್ ರನ್‌ನಲ್ಲಿ ಶ್ರದ್ಧೆಯಿಂದ ತೊಡಗಿಕೊಂಡಿದ್ದ ವಿಜಯಲಕ್ಷ್ಮಿ, ಪತಿಯ ಸಮಯ ಒಳ್ಳೆಯದಾಗಲಿ ಎಂದು ಅದೆಷ್ಟೋ ದೇವರ ದ್ವಾರ ತಟ್ಟಿದ್ದರು. ಆದರೆ ಇವೆಲ್ಲಾ ಹರಕೆಗಳ ನಡುವೆಯೂ ದರ್ಶನ್ ಮತ್ತೆ ಜೈಲು ಸೇರಿರುವುದು ಅವರ ಜೀವನದ ಮತ್ತೊಂದು ದೊಡ್ಡ ಹೊಡೆತವಾಗಿದೆ.

ದರ್ಶನ್ ಹೊರಗಿದ್ದಾಗ ‘ಡೆವಿಲ್’ ಚಿತ್ರದ ಪ್ರಚಾರಕ್ಕೆ ತೊಡಗಬೇಕಾಗಿತ್ತು. ಆದರೆ ಈಗ ಜೈಲಿನಲ್ಲಿರುವ ಕಾರಣದಿಂದಾಗಿ, ಆ ಜವಾಬ್ದಾರಿಯನ್ನೂ ವಿಜಯಲಕ್ಷ್ಮಿಯೇ ಹೊತ್ತಿದ್ದಾರೆ. ಅವರು ಸೋಷಿಯಲ್ ಮೀಡಿಯಾ ಹ್ಯಾಂಡಲ್ ಮಾಡುವುದರ ಜೊತೆಗೆ, ಪತಿಯನ್ನು ಭೇಟಿಯಾಗಲು ಜೈಲು ಓಡಾಡುತ್ತಿದ್ದಾರೆ. ದರ್ಶನ್ ಮತ್ತೆ ಯಾವಾಗ ಹೊರಬರುತ್ತಾರೆ, ಪರಪ್ಪನ ಅಗ್ರಹಾರದಿಂದ ಬಳ್ಳಾರಿ ಜೈಲುಗೆ ಸ್ಥಳಾಂತರವಾಗುತ್ತಾರೆಯೇ ಎಂಬ ಗೊಂದಲಗಳ ನಡುವೆ, ವಿಜಯಲಕ್ಷ್ಮಿಯ ಜೈಲ್ ರನ್ ಇನ್ನೆಷ್ಟು ಕಾಲ ಮುಂದುವರೆಯುತ್ತದೆ ಎಂಬುದು ಅಭಿಮಾನಿಗಳ ಪ್ರಶ್ನೆಯಾಗುತ್ತಿದೆ.

ಒಂದು ಕಾಲದಲ್ಲಿ ಟೆಂಪಲ್ ರನ್ ಮೂಲಕ ಪತಿಯ ಹೆಸರಿನಲ್ಲಿ ಹರಕೆ ಸಲ್ಲಿಸುತ್ತಿದ್ದ ವಿಜಯಲಕ್ಷ್ಮಿ, ಈಗ ಅದೇ ಶ್ರದ್ಧೆ ಮತ್ತು ತಾಳ್ಮೆಯಿಂದ ಜೈಲು ಸುತ್ತಾಟ ನಡೆಸುತ್ತಿದ್ದಾರೆ. ಇದು ಅವರ ಪತಿಯ ಮೇಲಿನ ನಂಬಿಕೆ ಮತ್ತು ತ್ಯಾಗದ ಸಜೀವ ಸಾಕ್ಷಿಯೇ ಸರಿ.