ಸಿಂಗಾಪುರದಲ್ಲಿ ‘ಕೂಲಿ’ ಹವಾ! ತಮಿಳು ಕಾರ್ಮಿಕರಿಗೆ ರಜೆ, ಟಿಕೆಟ್, ಪಾಪ್ಕಾರ್ನ್ ಉಡುಗೊರೆ

ಸೂಪರ್‌ಸ್ಟಾರ್ ರಜನಿಕಾಂತ್ ಅಭಿನಯದ ಬಹುನಿರೀಕ್ಷಿತ ತಮಿಳು ಚಿತ್ರ ‘ಕೂಲಿ’ ಬಿಡುಗಡೆ ದಿನಾಂಕ ಸಮೀಪಿಸುತ್ತಿರುವಂತೆ, ಅಭಿಮಾನಿಗಳ ಉತ್ಸಾಹ ಗಗನಕ್ಕೇರಿದೆ. ಲೋಕೇಶ್ ಕನಕರಾಜ್ ನಿರ್ದೇಶನದ ಈ ಚಿತ್ರ ಆಗಸ್ಟ್ 14, 2025 ರಂದು ವಿಶ್ವದ 100 ಕ್ಕೂ ಹೆಚ್ಚು ದೇಶಗಳಲ್ಲಿ ಭರ್ಜರಿಯಾಗಿ ಬಿಡುಗಡೆಯಾಗುತ್ತಿದೆ.

ಆದರೆ, ಸಿಂಗಾಪುರದಲ್ಲಿ ನಡೆದಿರುವ ಒಂದು ವಿಶೇಷ ಘಟನೆ ಚಿತ್ರದ ಹೈಪ್‌ಗೆ ಇನ್ನಷ್ಟು ಮೆರಗು ನೀಡಿದೆ. ಅಲ್ಲಿ ಇರುವ ಫಾರ್ಮರ್ ಕನ್ಸ್ಟ್ರಕ್ಷನ್ಸ್ ಪ್ರೈವೇಟ್ ಲಿಮಿಟೆಡ್ ಎಂಬ ಕಂಪನಿಯು ತನ್ನ ತಮಿಳು ಕಾರ್ಮಿಕರಿಗೆ ವೇತನ ಸಹಿತ ರಜೆ ಘೋಷಿಸಿದೆ. ಇಷ್ಟೇ ಅಲ್ಲದೆ, ಮೊದಲ ದಿನದ ಫಸ್ಟ್ ಡೇ ಫಸ್ಟ್ ಶೋಗೆ ಟಿಕೆಟ್‌ಗಳ ಜೊತೆಗೆ, ಪಾಪ್ಕಾರ್ನ್ ಮತ್ತು ಕೂಲ್‌ಡ್ರಿಂಕ್ಸ್‌ಗೆ 30 ಸಿಂಗಾಪುರ ಡಾಲರ್ ಭತ್ಯೆ ನೀಡುವ ವ್ಯವಸ್ಥೆಯನ್ನೂ ಮಾಡಿದೆ. ಕಂಪನಿಯು ಈ ಕ್ರಮವನ್ನು “ಕಾರ್ಮಿಕರ ಕಲ್ಯಾಣ ಮತ್ತು ಒತ್ತಡ ನಿರ್ವಹಣೆಯ ಭಾಗ” ಎಂದು ವಿವರಿಸಿದ್ದು, ಈ ಘೋಷಣೆ ಸೋಶಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಮೆಚ್ಚುಗೆ ಪಡೆದಿದೆ.

ಇದಕ್ಕೆ ಪಾರ್ಶ್ವವಾಗಿ, SB Mart ಎಂಬ ಇನ್ನೊಂದು ಸಿಂಗಾಪುರ ಕಂಪನಿ ಆಗಸ್ಟ್ 14 ರಂದು ಬೆಳಿಗ್ಗೆ 7 ರಿಂದ 11:30 ರವರೆಗೆ ತನ್ನ ಅಂಗಡಿಯನ್ನು ಮುಚ್ಚುವುದಾಗಿ ಘೋಷಿಸಿದೆ. ತಮಿಳುನಾಡಿನ ಮಧುರೈ ಮೂಲದ ಒಂದು ಸಂಸ್ಥೆಯೂ ಸಹ ತಮ್ಮ ಎಲ್ಲಾ ಶಾಖೆಗಳಿಗೆ ರಜೆ ಘೋಷಿಸಿ, ರಜನಿಕಾಂತ್ ಅವರ ಸಿನಿಮಾ ಬಿಡುಗಡೆಯ ಪ್ರಯುಕ್ತ ಅನಾಥಾಶ್ರಮ, ವೃದ್ಧಾಶ್ರಮಗಳಿಗೆ ಆಹಾರ ಮತ್ತು ಸಿಹಿತಿಂಡಿ ವಿತರಣೆ ಮಾಡುವ ಯೋಜನೆ ಹಮ್ಮಿಕೊಂಡಿದೆ. ‘ಕೂಲಿ’ ಚಿತ್ರದ ಟ್ರೇಲರ್ ಈಗಾಗಲೇ ಅಪಾರ ಕುತೂಹಲ ಹುಟ್ಟುಹಾಕಿದ್ದು, ಸೆನ್ಸಾರ್ ಮಂಡಳಿಯಿಂದ A ಪ್ರಮಾಣಪತ್ರ ಪಡೆದಿದೆ. ಇದರಿಂದಾಗಿ ಮಕ್ಕಳ ಪ್ರೇಕ್ಷಕರಿಗಾಗಿ ಚಿತ್ರ ಸೂಕ್ತವಲ್ಲ ಎಂಬ ಚರ್ಚೆಯೂ ನಡೆದುಬರುತ್ತಿದೆ. ಆದಾಗ್ಯೂ, ‘ಕೂಲಿ’ ವಿದೇಶದಲ್ಲಿ ಅತಿ ಹೆಚ್ಚು ಖರೀದಿಯಾಗಿರುವ ತಮಿಳು ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.

ಚಿತ್ರದಲ್ಲಿ ರಜನಿಕಾಂತ್ ಜೊತೆಗೆ ನಾಗಾರ್ಜುನ, ಸತ್ಯರಾಜ್, ಅಮೀರ್ ಖಾನ್, ಉಪೇಂದ್ರ, ಸೌಬಿನ್ ಶಾಹಿರ್, ಶ್ರುತಿ ಹಾಸನ್ ಮೊದಲಾದ ತಾರೆಯರು ಅಭಿನಯಿಸಿದ್ದಾರೆ. ವಿಶೇಷವೆಂದರೆ, ‘ಕೂಲಿ’ ಹೃತಿಕ್ ರೋಷನ್ ಮತ್ತು ಜೂನಿಯರ್ ಎನ್‌ಟಿಆರ್ ನಟಿಸಿರುವ ‘ವಾರ್ 2’ ಚಿತ್ರದೊಂದಿಗೆ ಬಾಕ್ಸ್ ಆಫೀಸ್‌ನಲ್ಲಿ ಭಾರೀ ಘರ್ಷಣೆಗೆ ಸಜ್ಜಾಗಿದೆ. ಆಗಸ್ಟ್ 14 ರಂದು, ಇದು ಕೇವಲ ಸಿನಿಮಾ ಬಿಡುಗಡೆ ದಿನವಲ್ಲ ಅಭಿಮಾನಿಗಳಿಗೆ ರಜನೀ ಹಬ್ಬದ ದಿನ ಆಗಲಿದೆ.