ಧನರಾಜ್ ಮಗಳಿಗೆ 'ಮುದ್ದು ಸೊಸೆ' ಎಂದು ಕರೆದ ಹನುಮಂತ ಲಮಾಣಿ – ಬಿಗ್ ಬಾಸ್ ಸ್ನೇಹ ಮತ್ತೆ ಮಿಂಚಿದೆ!

'ಬಿಗ್ ಬಾಸ್ ಕನ್ನಡ ಸೀಸನ್ 11'ನ ಮನೆಯಲ್ಲಿ ಬೆಳೆದ ನಿಜವಾದ ಸ್ನೇಹ ಇಂದು ಸಾಮಾಜಿಕ ಜಾಲತಾಣಗಳಲ್ಲೂ ಮಿಂಚುತ್ತಿದೆ. ಸ್ಪರ್ಧಿಗಳಾಗಿದ್ದ ಧನರಾಜ್ ಆಚಾರ್ ಮತ್ತು ಹನುಮಂತ ಲಮಾಣಿ ಅವರು ಮನೆಯೊಳಗೆ ಕಟ್ಟಿಕೊಂಡ ಬಾಂಧವ್ಯವನ್ನು ಮನೆಯಿಂದ ಹೊರಗಡೆ ಬಂದರೂ ನಿರಂತರವಾಗಿ ಮುಂದುವರಿಸುತ್ತಿದ್ದಾರೆ.

ಇತ್ತೀಚೆಗೆ ಧನರಾಜ್ ಅವರ ಮುದ್ದಾದ ಪುತ್ರಿ ಪ್ರಸಿದ್ಧಿಗೆ ಹನುಮಂತ "ಮುದ್ದು ಸೊಸೆ" ಎಂದು ಕರೆದಿದ್ದು, ಈ ಮಾತು ಸಾಮಾಜಿಕ ಮಾಧ್ಯಮಗಳಲ್ಲಿ ಭಾರಿ ವೈರಲ್ ಆಗಿದೆ. ಹನುಮಂತ ಪ್ರಸಿದ್ಧಿಯನ್ನು ಎತ್ತಿಕೊಂಡು ತೆಗೆಸಿಕೊಂಡಿರುವ ಫೋಟೋಗಳನ್ನು ಹಂಚಿಕೊಂಡಿದ್ದು, ಅಭಿಮಾನಿಗಳು ಈ ಸ್ನೇಹವನ್ನು ಬಹಳ ಸಂತೋಷದಿಂದ ಸ್ವೀಕರಿಸಿದ್ದಾರೆ.

ಬಿಗ್ ಬಾಸ್ ಮನೆಯಲ್ಲಿ ಸ್ಪರ್ಧಿಯಾಗಿದ್ದಾಗ, ಧನರಾಜ್ ಮುದ್ದಾದ ಹೆಣ್ಣು ಮಗುವಿನ ತಂದೆಯಾಗಿದ್ದರು. ಮಗಳನ್ನು ಬಿಟ್ಟು ಮನೆಯೊಳಗೆ ಬರುವ ಸಮಯದಲ್ಲಿ ಧನರಾಜ್ ತುಂಬಾ ಭಾವನಾತ್ಮಕ ಸ್ಥಿತಿಯಲ್ಲಿ ಕಂಡುಬಂದಿದ್ದರು. ಆದರೆ ನಂತರ, ಬಿಗ್ ಬಾಸ್ ಮನೆಯೊಳಗೆ ಮಗಳನ್ನು ಕರೆಸಿಕೊಂಡು, ಆ ಶ್ರೇಷ್ಠ ಕ್ಷಣವನ್ನು ಎಲ್ಲರೂ ಜೋತೆಯಾಗಿ ಅನುಭವಿಸಿದರು.

ಇದೀಗ, ಮಗಳಿಗೆ "ಪ್ರಸಿದ್ಧಿ" ಎಂದು ನಾಮಕರಣ ಮಾಡಿದ್ದಾರೆ ಧನರಾಜ್. ಇನ್ನೊಂದು ತಿಂಗಳು ಕಳೆದರೆ ಮಗುವಿಗೆ ಒಂದು ವರ್ಷ ತುಂಬಲಿದೆ. ತಮ್ಮ ಮಗಳ ಬಗ್ಗೆ "ಮುದ್ದು ಮಗಳೆ ಪ್ರಸಿದ್ಧಿ.. ನೀ ನಮ್ಮ ಬಂಗಾರಿ.." ಎಂದು ಭಾವನಾತ್ಮಕವಾಗಿ ಬರೆದುಕೊಂಡ ಧನರಾಜ್, ತಂದೆಯಾಗಿ ತನ್ನ ಅನುರಾಗವನ್ನು ಮೆರೆದಿದ್ದಾರೆ.

ಹನುಮಂತ ಲಮಾಣಿ ಮತ್ತು ಧನರಾಜ್ ನಡುವಿನ ಸ್ನೇಹವು ಬಿಗ್ ಬಾಸ್ ಮನೆಯಲ್ಲಿ ಮಾತ್ರ ಸೀಮಿತವಾಗಿಲ್ಲ. ಮನೆಯ ಹೊರಗೂ ಈ ಸ್ನೇಹ ಬೆಳೆದಿದ್ದು, ಪ್ರೀತಿಯಿಂದ ಭರಿತ ಸ್ನೇಹದ ಬಾಂಧವ್ಯಕ್ಕೆ ಈ ಫೋಟೋಗಳು ಸಾಕ್ಷಿಯಾಗಿದೆ. "ಮುದ್ದು ಸೊಸೆ" ಎಂಬ ಹನುಮಂತನ ಮಾತು ಬರೀ ಹಾಸ್ಯವಲ್ಲ, ಅವರು ಸ್ನೇಹವನ್ನು ಕುಟುಂಬದ ಮಟ್ಟಕ್ಕೆ ಎತ್ತಿರುವುದರ ಪ್ರತೀಕ. ಈ ಮೂಲಕ 'ಬಿಗ್ ಬಾಸ್' ಮನೆಯೊಳಗಿನ ಸಂಬಂಧಗಳು, ಮನೆಯಿಂದ ಹೊರಬಂದರೂ ಹೇಗೆ ಜೀವಂತವಾಗಿರಬಹುದು ಎಂಬುದಕ್ಕೆ ಧನರಾಜ್ ಮತ್ತು ಹನುಮಂತನ ಸ್ನೇಹ ಉತ್ತಮ ಮಾದರಿಯಾಗಿದೆ.