117 ಮೀಟರ್ ಎತ್ತರದಿಂದ ಬಂಗೀ ಜಂಪ್ ಮಾಡಿದ ಕಾರುಣ್ಯಾ ರಾಮ್ – ಧೈರ್ಯದ ಹೊಸ ಅಧ್ಯಾಯ!

ಸ್ಯಾಂಡಲ್‌ವುಡ್‌ನ ಪ್ರತಿಭಾವಂತ ನಟಿ ಕಾರುಣ್ಯಾ ರಾಮ್ ಅವರು ಇತ್ತೀಚೆಗೆ ತಮ್ಮ ಜೀವನದ ಬಹುಮುಖ್ಯ ಕನಸನ್ನು ನನಸಾಗಿಸಿಕೊಂಡಿದ್ದಾರೆ. ಪ್ರವಾಸ ಪ್ರಿಯೆಯಾದ ಅವರು ಈ ಬಾರಿ ಉತ್ತರಾಖಂಡ್‌ನ ಪ್ರಸಿದ್ಧ ಪ್ರವಾಸಿ ತಾಣವಾದ ರಿಷಿಕೇಶಕ್ಕೆ ಭೇಟಿ ನೀಡಿ, ಅಚ್ಚರಿಯ ಸಾಹಸಕ್ಕೆ ಮುಂದಾದರು.

ರಿಷಿಕೇಶ ಭಾರತದ ಅತ್ಯಂತ ಎತ್ತರದ ಬಂಗೀ ಜಂಪ್‌ ತಾಣಗಳಲ್ಲಿ ಒಂದಾಗಿದ್ದು, ಇಲ್ಲಿ 117 ಮೀಟರ್ (383 ಅಡಿ) ಎತ್ತರದಿಂದ ಬಂಗೀ ಜಂಪ್ ಮಾಡುವುದು ಅನೇಕ ಸಾಹಸ ಪ್ರಿಯರ ಕನಸು. ಕಾರುಣ್ಯಾ ರಾಮ್ ಕೂಡ ತಮ್ಮ ಆ ಕನಸನ್ನು ಈಡೇರಿಸಿಕೊಂಡು, ಉತ್ಸಾಹಭರಿತ ಜಿಗಿತದ ಅನುಭವ ಪಡೆದಿದ್ದಾರೆ. ಜಿಗಿಯುವ ಮುನ್ನ ಅವರು ದೇವರನ್ನು ಪ್ರಾರ್ಥಿಸಿ, ತಮ್ಮ ಸಾಹಸವನ್ನು ಧೈರ್ಯದಿಂದ ಆರಂಭಿಸಿದರು.

ಕಳೆದ ತಿಂಗಳು ತ್ರಯಂಬಕೇಶ್ವರಕ್ಕೆ ಭೇಟಿ ನೀಡಿದ್ದ ಕಾರುಣ್ಯಾ ರಾಮ್, ಮುಂದಿನ ಯುಗಾದಿಗೆ ಮುನ್ನ 12 ಜ್ಯೋತಿರ್ಲಿಂಗಗಳ ದರ್ಶನ ಮಾಡುವ ಉದ್ದೇಶವನ್ನು ವ್ಯಕ್ತಪಡಿಸಿದ್ದರು. ಈ ಪ್ರಯಾಣದ ಭಾಗವಾಗಿ ತಮ್ಮ ಆಪ್ತ ಸ್ನೇಹಿತೆಯೊಂದಿಗೆ ಕೇದಾರನಾಥ ಹಾಗೂ ದೋ ಧಾಮ್‌ ಯಾತ್ರೆಯಲ್ಲಿ ಭಾಗವಹಿಸಿದ ಅವರು, ಆಧ್ಯಾತ್ಮಿಕ ತೃಪ್ತಿಯ ಜೊತೆಗೆ ಸಾಹಸ ಪ್ರಿಯತೆಯನ್ನೂ ತೋರಿಸಿದ್ದಾರೆ.

ಬಂಗೀ ಜಂಪ್‌ ಮಾಡಿದ ನಂತರ ತಮ್ಮ ಅನುಭವವನ್ನು ಹಂಚಿಕೊಂಡ ಕಾರುಣ್ಯಾ ರಾಮ್, “ಜೀವನ, ಜನರು, ಪರಿಸ್ಥಿತಿ ಇವುಗಳ ಬಗ್ಗೆ ಎಲ್ಲರಲ್ಲೂ ಭಯ ಇರುತ್ತದೆ. ಆದರೆ ಭಯವನ್ನು ಎದುರಿಸಿ ಜಯಿಸುವುದೇ ನಿಜವಾದ ಸವಾಲು. ಯಾರೂ ನನ್ನನ್ನು ಕೆಳಗಿಳಿಸಲು ಅಥವಾ ನನ್ನ ಅವಕಾಶಗಳನ್ನು ಕಸಿದುಕೊಳ್ಳಲು ಸಾಧ್ಯವಿಲ್ಲ” ಎಂದು ಹೇಳಿದ್ದಾರೆ.

ಅದೇ ರೀತಿ ಅವರು, “ಯಾವುದೇ ಸವಾಲು ಮತ್ತು ಭಯವನ್ನು ಪೂರ್ಣ ಉತ್ಸಾಹದಿಂದ ಮತ್ತು ತಲೆ ಎತ್ತಿ ಎದುರಿಸಲು ನಾನು ಸಿದ್ಧಳಿದ್ದೇನೆ ಎಂದು ಜಗತ್ತಿಗೆ ತಿಳಿಸಲು ಇದು ನನ್ನ ಮಾರ್ಗ” ಎಂದು ಹಂಚಿಕೊಂಡಿದ್ದಾರೆ.

ಬಂಗೀ ಜಂಪ್ ಮಾಡುವುದು ತಮ್ಮ ಬಹುದಿನಗಳ ಕನಸು ಎಂದು ಕಾರುಣ್ಯಾ ರಾಮ್ ತಿಳಿಸಿದ್ದಾರೆ. ಆ ಕನಸನ್ನು ಯಶಸ್ವಿಯಾಗಿ ನೆರವೇರಿಸಿಕೊಂಡಿರುವ ಅವರು, ಧೈರ್ಯ, ಉತ್ಸಾಹ ಮತ್ತು ಜೀವನದ ಬಗ್ಗೆ ಹೊಸ ದೃಷ್ಟಿಕೋನವನ್ನು ಗಳಿಸಿರುವುದಾಗಿ ಹೇಳಿದ್ದಾರೆ.